مقالات حرهمنوعات

خليك قهوجى

قهوجى يوميا

طبعا أول أما حضراتكم قرأتوا العنوان جه فى بالكم شكل صبى القهوجى و إنى بقول لكم كونوا زيه .
ضيف موضوعنا النهارده يعتبر من اهم المكونات أو العناصر الأساسية لصباح أغلب الناس فى العالم ، مش كده و بس ده هى تعتبر كيف للمزاجانجية و كفاية ريحتها الكفيلة انها تغير المود ١٨٠ درجة ،
كمان ليها أجواءها الجميلة اللى تحب تكون معاك فيها ممكن تشربها وسط اللمة بيكون لها طعم مميز و يا سلام بقى و انت بتشربها وقت أو وسط المطر بيبقى ليها طعم مميز تانى خالص ، و بيكون ليها طعم تالت خالص و انت بتشربها فى مكان ليك فيه ذكرى حلوة .
أكيد حضراتكم عرفتوا ان ضيفنا هو (( القهوة )) و يلا بينا نشوف بدايتها كانت فين .

بالرغم من الشكوك الكثيرة حول المصدر الأول لحبوب البن و أوائل المستخدمين لها فيوجد الكثير من الأقاويل حول بدايتها .

تعتبر القهوة جزء مهم من التاريخ الاثيوبى و اليمني و فى اعتقاد بيقول إن اصل اكتشاف القهوة فى إثيوبيا و اللى أتعرف عليها اجداد قبيلة (( الأورومو )) و على تأثيرها المنشط على الإنسان الا انه لم يتم تحديد المكان الدقيق لنشأتها .

و فى أقاويل تانية و دى الأقرب بتقول انها اتعرفت جنوب شبه الجزيرة العربية تحديدًا فى اليمن فى الأديرة الصوفية اليمنية لغاية اما وصلت بلاد فارس و ارمينيا و تركيا و شمال أفريقيا و انها كانت تُستَهلك فى المقام الأول فى العالم الإسلامي لإنها كانت مرتبطة مباشرة بممارسة الشعائر الدينية .
اليمن تعتبر اول الدول اللى زرعت حبوب البن و عشان كده بنلاقى ان القهوة بيطلق عليها اسم ( Arabica ) و اللى معناه القهوة العربية و اللى مصدرها اليمن
و كمان وجود ( الموكا ) اللى أفخر و أجود أنواع البن ، اسم ( موكا ) اصل التسمية جه كتحريف عن قهوة (( المخاء )) اللى بتتنسب فى الأصل لميناء فى دولة اليمن تم عن طريقه تصدير اول شحنات البن إلى أوروبا و العالم ، و اما شاع المشروب ده فى اليمن اطلق عليه اسم ( قهوة ) لإن الاسم ده فى الأساس كان يُطلق على نوع من أنواع الخمور و اما وصلت لأوروبا أطلقوا عليها ( نبيذ العرب ) ، و بسبب مشروب القهوة جاءت فكرة المقاهى و كان اول مقهى اتعمل كان فى اسطنبول ثم القاهرة .

و فى خطوة هى الأولى من نوعها فى عام ٢٠١٤ فى الشرق الأوسط و بالتحديد فى مدينة دبى ، تم افتتاح ( متحف القهوة ) بدعم من هيئة الثقافة و الفنون ، و المتحف موجود فى منطقة الفهيدى التاريخية فى دبى .
زوار المتحف يقدروا يتابعوا طرق تحميص و تحضير اشهر مشروب فى العالم منذ اكتشافه و ده بيكون من خلال عرض أدوات و اجهزة مستخدمة فى تحميص و إعداد القهوة و بترجع الأجهزة دى إلى حقبات و دول مختلفة فى وجود اقدم قطعة اللى بترجع إلى ٦٠٠ عام تقريباً .
كما يتيح المتحف للزوار شرب القهوة بواسطة خبراء فى القهوة المصرية و الإثيوبية و ده بيكون داخل المتحف .
اما الهدف من تأسيس المتحف هو معرفة أهمية القهوة و مكانتها عند العرب و اعتبارها احسن وجوه الضيافة .

كمان المشروب السحري اللى بيكيفنا ده له فوائد كتير :
١- تحسين مستوى الطاقة و الذكاء .
٢- تساعد على حرق الدهون .
٣- تساعد على تحسين الاداء البدني للجسم و للرياضيين على وجه الخصوص .
٤- من الممكن أن تقلل من الإصابة بمرض السكر .
٥- الحماية من مرض الزهايمر و الخرف .
٦- الوقاية من الشلل الرعاش ( باركنسون ) .
٧- المساعدة على حماية الكبد .
٨- تحسين الحالة المزاجية و محاربة الأكتئاب .
٩- تقليل خطر أنواع معينة من السرطان .
١٠- النقطة دى بقى للبنات على وجه التحديد لإن القهوة تعمل على تنظيف البشرة من الخلايا الميتة و التخلص من الهالات السوداء و تقليل ظهور التجاعيد .

و أما ندقق هنلاقى أن القهوة لم تبخل على محبيها و وفرت لهم أنواع جديدة و كتير فى كل بلاد العالم و على سبيل المثال و ليس الحصر :
– القهوة العربى
– القهوة التركي
– القهوة الفرنسية
– كافيه لاتيه
– كابتشينو
– الموكا
‏ – flat white الأسترالية
– اسبرسو رومانو الإيطالية
– قهوة بالثوم اليابان
– كابى الهندية
‏ – fika السويدية
‏ – Cortadito كوبا
‏ – Bombon الأسبانية
‏ – frappé اليونانية
‏ – Café de olla المكسيك
– قهوة بالزبدة .. كيتو
– قهوة البيض فيتنام
– القهوة البيضاء
– توبا السنغال
– قهوة الويسكى أيرلندا
– كورتادو البرتغال

و دلوقتى بقا … تحب تبقى قهوجى ولا ملكش مزاج ؟

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى