من فات قديمه

هي القهوة التركي مش تركي؟.. اعرف الحكاية

مين اللي مش بيحب القهوة؟
مين مش بيشم ريحتها وخياله بيسرح معاها؟
مين مش بيتمنى الصبح يقعد في البلكونة يشربها مع صوت فيروز؟
مين مش بيتغزل في حبات القهوة وهي بتدوب مع السكر والمية قبل ما تغلي؟

“كلنا هذا الشخص!!”

لكن ايه رأيك لو عرفت أصل القهوة وليه اتسمت قهوة أصلاً وهل غلي القهوة طريقة تركية فعلاً ولا مصرية؟

تعالى معايا يلا احكيلك.

“أصل الحكاية”

أول مَن اكتشف حبات البن وعصرها هما اليمنيين ونقلوها لمكة لكن العلماء حرموها “شويه كده هقولك سبب التحريم واللي هتعرف منه سبب تسميتها بالاسم ده”.
وطبعاً بعد مكة وصلت مصر “أم الدنيا” وبلد كل حاجة حلوة.
جت عن طريق الطلبة اليمنيين اللي بيدرسوا في القاهرة بالأزهر الشريف.
وحبها جداً الشعب المصري وأصبحت المشروب الرسمي في المناسبات والأفراح.
أيوه.. زي ما سمعت في المناسبات والأفراح الأفراح الأفراح مش العزا.
وبقت في العزا بعد حادثة هحكيهالك تحت شويه.

“حافظ على هويتك”

وطريقة عمل القهوة مصرية يعني حضرتك وانت داخل القهوة أو الكافيه تقوله قهوة تركية بتشوه تاريخك وبتنسبه لناس تانية.
غلي القهوة في الماء طريقة مصرية 100٪ كعادتنا في الابتكار والتغيير في أي شئ يوصلنا.

“ليه اتحرمت القهوة؟”

الأتراك وصلتهم القهوة متأخر لأن السلطان العثماني حرمها وقطع راس كل اللي كان بيشربها بسبب فتوى التحريم اللي هقولك عليها دلوقت.

خلينا نقول يعني ايه قهوة لغوياً:
قهوة في اللغة العربية كانت بتتقال للخمر “من القهو” لأنها تقهي شاربها عن الطعام والشراب وتخليه يحس بالشبع.
وكان بيسموها موكا نسبة إلى مدينة المخا اليمنية اللي كانت بتتنقل منها حبات البن إلى العالم.
ولصعوبة نطق المخا على الأجانب سموها “موكا”.

وحرموها لأنهم شافوا إن الكافيين بيذهب العقل بفتوى من شيخ الإسلام أبو السعود أفندي في عصر سليمان القانوني.
وسليمان القانوني ده نفسه أدمن القهوة وافتتن بيها وهو محرمها على شعبه لما دخلت بيته عن طريق زوجته “خرم” .

“سبب شرب القهوة في العزا”

لكن لما حرموا القهوة في مصر قامت المعارك بين مؤيدين فتوى المفتي وبين المعارضين.
والفتوى للفقيه الشافعي “أحمد بن عبد الحق السنباطي”.
المعارك ديه اتقتل فيها واحد من التجار المعارضين للفتوى، وكالعادة المصريين أساتذة كيد والراجل المصري حر ومبيخافش.
قاموا نصبوا العزا ووزعوا القهوة على المحتجين لكن قدموها بدون سكر حزناً على التاجر.
وبعد تعيين مفتي جديد أفتى بأنها حلال.

“اعرف نفسك”

اوعى حد يضحك عليك ويفهمك إن المصريين ملهمش بصمة من عهد الفراعنة لحد يومنا هذا.
ممكن منبقاش أصحاب الاكتشاف الأول لكن بكل تأكيد بنزود بصمتنا المختلفة عن أي شعب تاني.

لازم التاتش بتاعنا

ومن النهارده قولهم اسمها قهوة مصرية واوعى تتكسف لأنك على حق.

وشاركونا برأيكم واقتراحاتكم.. عايزين تعرفوا أصل ايه تاني؟

كتبت: صابرين الهلالى

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى