ابداعات قلم

أشهر الأخطاء التربوية

التربية

 

١- لو ماكلتش هوكله لأخوك هتربي عنده القلق والتوتر والبخل والإثرة

٢- خد ده بس ماتعرفش أخواتك
هتعلموه الانانية والذاتية
ولو أخواته عرفوا وغالباً الأبن المشوه نفسياً ده هيعرفهم عشان يغيظهم هينموا فقلبهم الكره والحسد لأخيهم
لازم نعدل بين أولادنا ومانفرقش بينهم ومانميزش الولاد علي البنات أو العكس

٣- ذاكر عشان احبك
ماتعلقوش أي طلب بالحب الحب لازم يكون غير مشروط
لازم يؤمن ان الحب ده موجود دايما مهما عمل غلط بيرجع للصواب عشان بيحبكم
فماتحسسوهوش انه هيفقد الحب ده عشان غلط

٤- لو ما بطلتش عياط هكرهك
إياكم و إقحام الحب والكره في علاقتكم لأي سبب
استخدام سلام الحب والكره بيفقد الطفل ثقته في انه جدير بالحب الخالص بيحسسه بالنقص وبيخليه انطوائي
البديل
أنا بحب الجد والإجتهاد
أنا بكره الكسل و عدم القيام بالواجبات
أنا بكره العياط
الوالدين يكرهوا الفعل مش الفاعل

٥- هغضب عليك لو ماعملتش كذا
استخدام سلاح البر لتسخير الأبناء بيرهقهم نفسيا ويوترهم
إستخدام سلاح البر ضد ابن واحد واستغلال طيبته لخدمة باقي الأولاد ظلم عظيم

٦- لو ما نمتش / أكلتش / سكتش أبو رجل مسلوخة هياكلك هرميك برا البيت للكلب يعضك الخ
أسلوب التخويف بيفقد الأبن الشعور بالأمان ويفقد ثقته فيك كمصدر للحماية وإذا كان أقرب الناس هيعمل كده الغرب هيعملوا في إيه

٧- ياللي مفيش منك يا أجمل وأحلي من خلق أنت أذكي واحد أنت أشطر وأمهر واحد
ماتفرطوش في الثناء علي كل حاجة بسيطة يعملها
هيتغر و هيفتكر نفسه نابغة زمانه
وما تبالغوش في محاولات توفير سبل السعادة والراحة و وازنوا بين الرفق والدلع
لانه هيتصدم في العالم الخارجي اللي مافيهوش تقدير لجهوده الجبارة و كله تعاسة وشقاء و مفيش فيه رحمة
ماتبالغوش في تلبية كل طلباته المادية بأسرع وقت لازم شهواتهم تتهذب بالصبر لازم يشاركوا بمصروفهم لازم يحسوا بضغوطكم المادية وياريت تعرفوهم وضعكم المالي وتشركوهم في جلسة لإعداد ميزانية البيت
كمان ماتبالغوش في إهمال ذاتكم وتوفير كل شئ للأولاد لازم يتعلموا منكم إن لكم حق علي نفسكم فيعتعلموا ازاي مايفرطوش في حق نفسهم

٨ – حاسب لتقع قم من علي الأرض لبسك هيتوسخ مش قلت لك ماتوقعش علي لبسك أكل
لا ماتوديش الكوبايات لتتكسر أنت مش هتقدر
المبالغة في العناية و المراقبة المستمرة والرعاية اللامتناهية بتخلي أولادنا فاقدين للثقة في قدرتهم علي فعل أي شئ بشكل كامل لإنعدام الخبرات الذاتية
وبتدي رسالة أن اللبس والكوب والأغراض عموما أغلي منه

٩ – ماما رتبت الصالة مش كنتي ترتبي غرفتك الأول؟!!!!
ماما رتبت غرفتي إيييييه ده فيه تراباية هنا وفتفوتة ورقة هناك المرة الجاية تبقي ترتبي بذمة
السلوك المحير من الأهل وعدم رضاهم ولا تقديرهم لمحاولات أولادهم في استرضائهم ونيل مدحهم واستحسانهم بيصيب الاولاد بالإحباط و بالامبالاة والتبلد وفقدان الثقة في النفس وفي الغير ليه يبذل جهد لما مفيش حاجة بتعجب مهما عمل
الموازنة بين المدح والتقدير والمبالغة فيهم ضروري جداً

١٠ – أنت غبي أنت سيئ أنت عنيد أنت قليل الأدب
أنك توصم إبنك بصفات وسمات سلبية ناتجة عن تصرف لا واعي لطفل
بيخليها تستقر فوعيه ويبتدي يمارسها كسلوك واعي

١١- مفيش فايدة فيك
تولد اليأس من إصلاح الذات و تهيئ الطفل للمزيد من السلوكيات السيئة

١٢ – شوف اخوك متميز ازاي؟
اياكم والمقارنة بتولد الإحباط والغيرة والحسد والنفور
راعوا الفروقات الفردية والاختلافات في الشخصية
طريقتكم اللي نجحت مع الكبير مش شرط أبداً تنفع مع اللي بعديه

١٣ – جبتلك قميص حرير
تعالي يا سكرة أحط لك عطر وأنتِ خارجة
الأمر المحرم علي الكبار ماتسمحش له به من صغره

١٤- بطل كتر أسئلة و فضول
بتقتل غريزة الإطلاع و حب العلم والمعرفة
بتحرج وتعمل فجوة بينكم وبين أولادكم

١٥ – ماما عاوز إتكلم مش فاضية بابا عوزك في موضوع مش فاضي
إهمال الحوار مع الأبناء نتيجة الإنغماس في العمل بيولد الإحساس بالنبذ وإنعدام الثقة في النفس والإنطواء والتبلد الإنفعالي واللامبالاة لآوامر الوالدين
ومن الممكن أن يتطور لسلوك عدواني والعناد والسرقة
لازم يكون فيه جلسة حوار يومي غير الحوار المتقطع في باقي أوقات اليوم لازم تعرفوا إيه اللي بيدور جوا مخه لازم تعرفوا طباعه و هواياته وآماله وأحلامه لازم تعرفوا أصحابه وفكرته عنهم
لازم يبقي فيه صداقة تراكمية بينكم

١٦ – الضربة دي عشان عملت كذا من أسبوع وكذا من شهر
العقاب يا يبقي في نفس الوقت عشان الطفل يستوعب غلطته
ومايبقاش عنيف للأسف الضرب علي التوافه من الصغر مابيفيدش بل علي العكس بيشوه
يا خلاص المسامح كريم لكن تحوش له وتكيل ده ظلم بطفلك

١٧ – شوف أنا حاولت معاك كتير بالذوق وخلاص جبت أخري وهضربك و طاخ طوخ طيخ
بيوصل لإبنك كذا رسالة
أنت كذاب لأنك ماحاولتش كتير
أنت عاجز عن التصرف وبتعبر عن عجزك بضربه
أنت متوتر ومضغوط ومحبط وبتنفس وتفرغ فيه غيظك وحنقك
فيولد عنده نوبات الغضب لما يعجز عن شئ أو يحبط و يتوتر وينضغط يخبط ويكسر و يرمي بالعيب واللوم علي الأضعف منه
إنك بتضربه عشان أقوي وهو هيعجز عن الرد وبالتالي من حقه يعمل كده مع أخوه الأصغر ولو أصغر واحد هينفس مع الأقارب الأصغر أو حتي لعبه
بتشوه معني الحب وتوصل له إن الضرب والحب بيجتمعوا فتأهل بنتك لإن زوجها يضربها وبأقل نظرة تسامحه وعادي كأن شيئا لم يكن

١٨ – أنت عارف هموتك من الضرب بالحزام هشررك الدم
لو ماذاكرتش وتفوقت
لو ماخدتش بالك مو إخواتك وأحنا في الشغل
لو مارتبتش غرفتك
بنفتكر إننا ممكن نخلي عيالنا مثاليين بالقسوة المبالغ فيها
رغم أن نتيجتها طاعة واحترام مؤقتين في العلن لكن في السر هيستمر
وأن توقف من رعبه من العقاب في أول فرصة هيكرر الغلط وهيكرره بشكل انتقامي بس عشان يثبت أن عقابكم ولا له أي لازمة
غير كراهيته للطاعة أو الأمر اللي اتعاقب بقسوة عليه
يكره الدراسة يكره النظافة يكره الالتزام بأي شيئ يكره اخوانه
يصاب بالبلادة
يخزن الأنفعلاتالعصبية ويفرغها مستقبلاً علي هيئة نوبات غضب أو صراع انفعالي داخلي

١٩- عقاباً لك هحرمك شهر من المصروف / من الكمبيوتر
العقاب الطويل الأمد بييئس الأبن من عملية الإصلاح إيه الدافع مفيش
ولو العقاب هو الحرمان من شئ مابيتكررش كتير زي خروجة العيد أو العيدية بردو نتيجته سيئة جدا

٢٠ – اوعي تدخن زيي ده التدخين حرام و مضر بالصحة
أنك تنصح إبنك بما لا تفعل هيربي عنده النفاق والعجز والكسل
للأسف إذا كان رب البيت بالدف ضاربا لازم القدوة

٢١ – اوعي تتحرك ولا تتنفس وإحنا فزيارة الاصحاب
فرض القيود الصارمة اللي مش بتتناسب مع خصائص المرحلة بيولد الكبت ومن ثم الإنفجار
ده مش معناه أنك تحط أعصابك في ثلاجة وتتعامي عن عمايل إبنك وتخريبه في بيت المضيف
لازم تقوم في إبنك وتمنعه من التخريب ماتتركش صاحب البيت محروق دمه وكاتم غيظه ويكره زيارتكم
وماتعرضهوش لإحراج أن هو اللي يوقف طفلكم ويمنعه عن التخريب
بلطف هدي إبنك وحفزه علي الإلتزام بعدم فعل شيء يضايق المضيف
خد معاك لعبة او لعبتين بيحبهم فينشغل بيهم
او قوم روح

٢٢- يابني لازم تسمع كلامي و…………….
حاولوا تتبادلوا النقاش مع أولادكم المواعظ والمحاضرات المطولة الطفل بيمل منها وغير ذات جدوي
وهتنمي فيه عدم الثقة بقدرته علي التفكير وتكوين آراء وإتخاذ قرارات
ويكون النقاش بشكل هادي خالي من الصراخ لأن الدراسات بتشير لأن الطفل وقت صراخ الكبار عليه مخه بيكون مشلول و مغلق ومش بيفهم ولا يستوعب أي شئ

٢٣- الإبن : ماما عاوز حلويات الأم : لأ مش الآن الأب : خد اللي أنت عاوزه
عدم توحيد الاسلوب التربوي هيجعل الإبن يميل ناحية الطرف الأقوي اللي بيحقق له رغباته ويعلمه التملق والنفاق
وهيوصل له معني فرقاء بدل شركاء الحياة
وهيشككه في أي قرار منكم طالما ضد رغبته

٢٤- وأنتم لوحدكم : تفففف يا عسل ده تف علي
أمام الناس : تفففف يا قليل الأدب كده عيب
تذبذب أسلوب التربية بيعلم الطفل مراقبة الناس فرد فعله وما يريد بيتحدد حسب رغبات من حوله

٢٥ – ممنوع لعب الكرة في الصالة ممنوع سهر بعد ١٠ بالليل
ممنوع اللعب بمسدس الماء بالشتاء
لاااااا بس أنا عاوز العب وأسهر
خلاص ماشي
عدم إحترام القوانين الموضوعة وتراجعكم عنها تحت ضغط الإلحاح والبكاء مرة هيوصل للطفل إن أي شئ قابل للتفاوض و بسلاح الزن والبكا هياخد اللي عاوزه
القواعد تتخرق بشرط وعلة
هنسهر النهاردة بس عشان الضيوف اللي عندنا
هنلعب بمسدس الماء ١٠ دقايق وأنت بتستحمي

٢٦ – ماما عاوز أخرج مع الولاد العب لا عاااااا طيب روح
طالما قلتم لا يبقي ما ينفعش نرجع فيها
لكن ممكن نوصل لحل وسط
هتخرج بعد ما تاكل غداك مثلاً

٢٧- ياإبني أنت لسة صغير اسمعني بس
هتاكل ده يعني هتاكل ده
هتلبس ده يعني هتلبس ده
عاوز كذا لأ طب كذا لأ لأ لأ
التسلط والتحكم وإلغاء شخصية الأبناء يؤهلهم لشخصية ضعيفة سهلة الإنقياد للآخرين فاقدة القدرة علي التفكير وإبداء الرأي والإبداع
مش من الحكمة أننا نسيطر ونرفض كل ما يطلبه الأبناء لأنهم هيتحايلوا ويعملوا المرفوض من وراكم
لازم نترك لأولادنا مساحة شخصية للتجربة والخطأ وخصوصاً الطفل اللي عنده ثقة زايدة فنفسه أنه يعرف كل حاجة
عشان يتقبلوا وجودنا في حياتهم كأصدقاء للمتابعة والتوجيه والتقويم بدون شماتة في فشلهم وأكثر ما يصدهم عنا الجملة الكريهة مش قلت لك إنك مابتعرفش

٢٨- رتب غرفتك لأ دلوقتي حالا ترتبها لأأ طيب أنت معاقب وهعمل وأسوي …..
غياب المرونة بيقطع حبال الود
طالما أمور مش مصيرية ولا مرتبطة بوقت محدد اسألوه ليه مش هيطيع الأمر في الحال تناقشوا معاه امتي هيكون مستعد لده وبود اطلبوا منه ابلاغكم أنه أتم المطلوب
لكن لو الامور مقيدة بوقت محدود النقاش بود أكثر فاعلية من الصراخ والتهديد والوعيد و الخصام والبعد والنفور
ولو أصر علي الرفض رغم الود في الحديث فسيبوا خيوط للرجعة
بينوا له ضيقكم وافترقوا وانتم مش أعداء
والمرونة تشمل صبركم علي عدم تنفيذه للتعليمات مرة وأتنين وعشرة
كرروا التعليمات بينوا ضيقكم ممكن عقاب متناسب مع الوضع لكن الإجراءات القاطعة المنفرة تجنبوها

٢٩- إبنكم ضرب إبن الجيران سيبوهم عيال مع بعض
عدم إيقاف السلوك السيئ من بدايته يؤهل إبنكم للتمادي
لازم تنصروا إبنكم ظالماً أو مظلوماً بمنعه من أنه يَظلم أو يُظلم

٣٠- بطلي عياط أنتِ كبيرة بطل عياط أنت راجل
الطفل هيفسره بأن البكاء سلوك غلط
ويخليه يشك في قدرته علي الحكم علي الأمور
والبكاء انعكاس للضيق و للقلق والتوتر والخوف عند الطفل
لازم تشوف إيه اللي بيبكيه بسؤاله مباشرة بود وحنان بتعيط ليه؟
قول له أنا عارف إن الأمر ده بيضايقك أو يخوفك
فكر معايا نعمل إيه
أما إذا كان العياط علي شئ ممنوع بردو بود وحزم قول له أنا عارف أنك عاوز كذا وده ما ينفعش عشان كذا وكذا
أو هينفع في الوقت الكذا أو لما تعمل كذا

كمان عدم فهمك لمقدار النمو العقلي والنفسي لأولادك هيخليك تحاسبهم بشكل مجحف وظالم فهيولد النفور والكره بينكم

ولازم عدم المبالغة في تطمينه أن كل شئ هيبقي تمام ومفيش تعب ولا أي شئ وأنكم هتقوموا بكل شئ
لو كان عنده قلق أو خوف من مشكلة أو غلطة عملها لازم نفهمه أننا هنحاول الإصلاح ونتحمل مسئوليتنا عن الفعل الغلط بشجاعة عشان مايوصلوش رسالة اعمل غلط زي ماأنت عاوز بابي ومامي هيصلحوا كل شئ ويصاب بالبلادة واللامبالاة

٣١- سلم علي عمو يا حبيبي بطل كسوف هو أنت بنت؟
الخجل شعور طبيعي في سن الطفولة لكن لو حسيت أنه زايد عند طفلك فلازم تقوم ده بالكلام معاه عن اللي منتظره و من هيقابله لتخفيف توتره وخجله
لكن الإستهزاء بالمشاعر الطبيعية يولد إنعدام الثقة في نفسه وفيكم

٣٢- بطني بتوجعني بطل دلع
البديل حتي لو بيمثل سلامتك يا حبيبي تعالي ادلكهالك واقرالك قرآن
لازم تستوثقوا أن مفيش شئ عضوي
أما لو واثقين من أنه بيمثل وجع أو ألم يبقي لازم تشوفوا دوافعه
هل بيلفت إنتباهكم لإحساسه بإنشغالكم
هل بيتحجج لإنه كاره أو خايف من شئ
عدم الإهتمام بدوافعه اللي ادعي المرض بسببها هيفقده الثقة في حبكم

٣٣- أنزل اشتري الطلبات / ذاكر / رتب غرفتك مش عاوز هديك ٥ جنيه ماشي هاتي وأعمل
المكافئات المادية علي الأعمال اللي هي صميم واجبات الإبن هتخليه مادي ومع الوقت هيطمع في المزيد وهيصاب بعدم الرضا و السخط وممكن يمتنع عن العمل طالما مفيش مقابل مادي
كل ماهو من صميم وإجباته المكافئة تكون معنوية أو أي شئ غير الفلوس
قبلة حضن مدح خروجة حفلة شاي شكولاتة
الأعمال الزايدة عن واجباته زي التفوق والدرجات النهائية وتعلم لغة أجنبية حفظ القرآن الحصول علي مركز متقدم في الرياضة اللي بيمارسها قراءة كتاب ديني أو تاريخي للتثقيف
٣٤- أقل من ١٠٠٪؜ مش هقبل
تصميمك علي مستوي محدد هيتطلب منهم بذل مزيد من الجهود وخصوصاً لو كان يفوق قدراتهم هيحرمهم من طفولتهم وأنهم يعيشوا مراحل عمرهم الطبيعية وده بيؤهلهم للخلل النفسي والعضوي
كم طفل أصيب بالمرض بسبب الضغط عليه في المذاكرة ومعاقبته لو نقص درجة ؟ كتيييير

أقل من طب أو هندسة ما تبقاش إبني ولا أعرفك
المجتمع محتاج لأشخاص أسوياء يشغلوا كافة المناصب والمهام
ليه تحسس إبنك أن فئات محددة هي بس الجديرة بالإحترام والحياة وتخليه لو تفوق ينظر للناس بنظرة دونية؟!!

٣٥- بابا عاوز أنام فحضنك هو أنت نغة أنت بقيت راجل
ماما خديني جنبك هو أنتِ بيبي أنتِ كبرتي وبقيتي طولي
ماتخجلوش من ممازحة ومضاحكة واحتضان أولادكم واظهار مشاعرحبكم لهم لسة جواهم طفل مسكين حائر مشتت عاوز ضمة تطمن قلبه وتسكن خوفه وقلقه وهتعلمهم يعبروا عن مشاعرهم بشكل سليم
كده هتصدوهم عنكم وتخجلوهم من مشاعرهم

٣٦- أنت فيك وفيك وأنت وأنت عملت وسويت و من سنة ومن خمس سنين
بلاش النقد والتأنيب والتوبيخ والجلد علي كل صغيرة وكبيرة
ومع أي مستجد تفتحوا له سجلاته من ساعة ما تولد وتعايروه بأخطائه القديمة وتحقروا وتقللوا من شأنه
غير نفوره منكم هتولدوا عنده التردد والخوف
والرعب انه يغلط ومين مابيغلطش
هيبقي معندوش ثقة فنفسه ولا جرأة أنه يتكلم وسط ناس يخاف من الظهور تسلط الأضواء عليه بيرعبه
ولما يكبر هيبقي شخصية انطوائية إنسحابية انهزامية
ويوجه العدوان ناحية ذاته و فاقد الإحساس بالأمان
يمدح في الناس ويمجدههم ويتملقهم عشان يأمن شرهم
ويزدري ويحطم فنفسه خلاص بقي يستعذب الإهانة

٣٧- بابا / ماما أنا عملت كذا وكذا إيييييه ده أنت صفتك ونعتك و بجد لأعمل فيك وأسوي
هو جالكم يحكي عشان يفرغ ضغطة النفسي و يلاقي حل مش يلاقي توبيخ وتأنيب وعقاب يبقي المرة الجاية يكتم مشاعره و يخبي أسلم له ولو واجهتوه هيكدب أكيد

٣٨ – شفتوا صاحبكم بيعمل إيه
تخيلوا يا اخواتي إبني بيعمل كذا
حكاياتكم الساخرة أو المضحكة أو المشينة عن طفلكم تعدي سافر علي خصوصية إبنكم
بيفقده الثقة فيكم وفي نفسه بيولد الشعور بالمهانة والدونية
بيحرجه و بيحسسه إنه عريان
من أسوأ مايمكن أنه يدمر علاقة الإبن بأهله إنهم يفضحوه أمام الناس
حتي لو رضيع ما تتكلموش عن عيوبه أو تتندروا بأفعاله الطفولية أمام أحد وخصوصاً في حضوره
الرضيع بيستوعب يا جماعة
كل كلمة أوصوت وضوء وحركة وريحة ولمسة
بتتخزن في مخه وبتترتب علي هيئة معلومات وخبرات

٣٩- مين اللي عمل كده؟؟ مش أنا ولا أنا يعني مين اللي عمل ؟؟؟ للأسف ما ينفعش تمسكوا الاتنين تضربوهم كل اللي تقدروا عليه انكم تبينوا لهم ان الله رقيب سميع بصير عليم خبير وإن الصدق منجاة وعاقبته الجنة وإن الكذب يغضب الله وتدوهم الامان انكم مش هتضربوا اللي عمل كده بس تفهموهم ليه ده غلط و ماتصروش تعرفوا الحقيقة يوم بعد يوم هتنمو مراقبة الله وخشيته في نفوسهم

ولو عرفتوا الحقيقة
ده أنا هقطعك
ياريت ما نقولش الكلمة دي
لازم نفرق بين اللي تم تخريبه عمداً أو عن غير قصد أو بسبب التقصير في اتباع التعليمات وفي أي حال نسترجع ونعلمه يسترجع
لو عمداً نعلمه من خلال توبيخ إيجابي مختصر يستغفر لأن المفسدين أخوان الشياطين
لو عن غير قصد خلاص قدر الله وماشاء فعل ومانوبخوش
لو فيه تقصير نعلمه غلطه

٤٠- ماما بتعيطي ليه؟ مفيش يا حبيبي
إخفائكم سبب حزنكم وضيقكم عن الأولاد بدافع الحفاظ علي نفسيتهم من المشكلة مش هو الحل لأن الطفل مع دموع الأهل المسئولين عن حمايته ورعايته نما جواه القلق والخوف من السبب الخفي
فالحل أنكم تبسطوا له المشكلة وتطلبوا منه الدعاء أو تشركوه في طلب التفكير لحل لها لو ده ينفع أو تطلعوه علي سبب الحزن حتي ولو وفاة أو سفر الخ

٤١- عااااا بيعيط ليه ده عاوز لعبتي يا ماما إديهاله سكته صغير وبكرة يعقل بس دي لعبتي بقول لك اديهاله دماغي وجعاني
هتريحوا دماغكم بشكل مؤقت هتتعبوا باقي العمر
لازم ترفعوا شعار كل واحد أولي بماله
اللي بيعيط لو من أول مرة ماستجابتوش له هيبطل عياط
لكن لو إستجبتوا له هينمي جواه الطمع والجشع والذاتية وعدم الاحساس
ده عير ظلمكم للإبن الأكبر بحرمانه من حقه وسلبه لأغراضه وماله

٤٢- بس يا قصير اسكتي يا سودة تعالي يا عجل روحي يا عصعوصة
نعتكم لأولادكم بصفات خَلقية مالهمش يد فيها بيدمر ثقتهم في نفسهم بخليهم شخصيات خجولة منطوية

٤٣- وقعت لااا إخبط الأرض يا حبيبي
الباب خبطك إضرب الباب أء يا باب أء
إذا الإبن اتخبط ولا وقع نعلمه انه يذكر الله ويحاسب بعد كده
لكن نحمل جماد او أي شئ أو شخص تاني المسئولية ونعاقبة فده بينمي عدم تحمل المسئولية و إتهام الاخرين بغير وجه حق
وهيكبر ويحمل اللي حواليه ضغوطات حياته
وللأسف بعض الحالات وصلت إنها تعاتب وتلوم خالقها علي أي مشكلة وقعت فيها لدرجة أن البعض وصل للإلحاد
٤٤ – وقعت أحسن طاخ طاخ عشان ماسمعتش كلامي
إحساس الصدمة وفقدان الأمان لما يكون إبنك متألم ومتوقع منك حب وحنان ويفاجأ بألم نفسي بسبب شماتتك فيه و مزيد من الألم البدني علي ألم الوقعة من ضربك
إحضنوا أولادكم ودلكوا لهم موضع الوجع او عالجوا الجرح
وعلموهم يسترجعوا ويحمدوا الله
ويحاول ياخد باله ويحرص بعد كده

٤٥- واااااوااا وااااا لا يا حبيبي ماتعيطش أنا  جايالك
ماما وحشة ماتزعلش ماما سايباك لا يا حبيبي
لما تكوني مشغولة وإبنك بيعيط ما تشتميش وتعيبي نفسك هيتنمي عنده الإحساس بالظلم وأنكم دايما مقصرين في حقه وتستحقوا الشتيمة والضرب بعد شوية
لكن دعميه وقولي ماتعيطش يا حبيبي ماما مشغولة فكذا و شوية وجايالك كلميه وأحكي له مرة علي مرة مداركه هتوسع ويفهم

إسألوا الله التوفيق والهداية بفضله ومنه وحوله وقوته

غادة إبراهيم

شاهد أيضاً
إغلاق
زر الذهاب إلى الأعلى