ابداعات قلم

مرحلة ما قبل الوصول

الميه اللي بتتفتح في الأرض في الأول مبتأخدلهاش مسار ، بتلاقيها بتجري في كل ناحية ، بس مع الوقت بتنحت لنفسها سكة وتمشي فيها ،،

بالظبط زي حياتنا ..التوهه اللي بتبقي جوه كل واحد فينا في مرحلة التخبيط هنا وهناك ، والتوهه وسط حاجات كتير قوي بتحبها وبتعرف تعملها ، مرحلة أختيار الكرير اللي بنفضل حبة حلووين كدا مش شايفين له ملامح ، وبعد ساحبة من الدنيا في حتت أنت مكنتش ممكن تفكر يوم أنك تكون فيها وأبعد ما يكون أن يكون هو دا اللي كنت رسمه لحياتك بتقف دقيقة حداد وصمت علي كل الأحلام والأماني الخيالية اللي حلمتها.

 

وزربوووو ..بتلاقي نفسك فجأة نزلت علي أرض الواقع ..حيث إنه ليست كل الأماني ممكنة يا عزيزي ،،

وعلى الرغم من كونك في حتة غير اللي بتتمناها لنفسك ..بتفضل طول الوقت عندك فضول بيخليك تدعبس جواك ، تستكشف نفسك أكتر ..أنا إني فيهم وبحب أعمل ايه ؟؟

 

هتفضل تدور وتجرب لغاية ما توصل وتعرف أنه يجوز أشتغل الشغلانة اللي محلمتش بيها في يوم بس جنبها أنا قادر أدور على شغفي وأعمله

أنا قادر أتنفس في وسط الحاجات الصغيرة اللي بعملها لنفسي علشان أوصل لحلمي .. ساعتها بس هتحس أنك وصلت للحتة اللي هتعرف تبدع وتدي وتعلم وتسيب علامة فيها ،،

 

كتبت / وفاء عبداللطيف

شاهد أيضاً
إغلاق
زر الذهاب إلى الأعلى