أنا طيفك
بتطوي ليه في صفحتنا
وليه عاوز أكون ذكرى
وعاوز تنهي قصتنا
ومستعجل على بكرا
ماتستعجلش لفراقنا
وأنا لسه في نن عنيك
ومش بسهولة إني أغرب
وألم شعاعي من حواليك
بتتعالى وبتكابر
أنا طيفك
وترجع ليا وبسامحك
وبتمنى أكون بذرة
لحلم جوا كف إيديك
فتبدرني في غيط الشوق
وأكون حلمك وأكون قمحك
ومن صغري وأنا عاشقة لتفاصيلك
ولملامحك
وصعب تنهي
قصتنا
تسيبني
أعيش على جرحك
منين ما تروح أنا جواك
تحاول تنسى و متقدرش
كفيل عطري يعدي الليل
على عيونك ومتغمضش
ولمسة إيدي مش سهلة
وغمزة خدي على كتفك
وطبطبتك على شعري
وأنا إيدي على قلبك
أنا طيفك
هتهرب فين يا روح الروح
أنا حواليك في كل مكان
معاك طيفي منين ما تروح
وخطوة رجلي على رجلك
متسألنيش دا ليه وإزاى
رذاذ حبي على وشك
هكون لك في الخيال طيفك
وأكون لك في الهوى نفسك
وهفضل في الوجود خايلاك
وقابضة بإيدي على قلبك
أنا طيفك
وأنا في كل البنات حوا
وروحي فيها ساكنة لك
ما بين شقرا وبين سمرا
أنا بس اللي لايقة لك
ومتقولش إني مغرورة
ولا تقول إني ساحرة لك
أنا في الحب أوابة
وخارجة من تنا ضلعك
ومهما تلف ولا تروح
أنا من قلبي داعية لك
تكون قلبي
وأكون لك روح
وأكون لك أم لعيالك
اقرأ أيضا: أتعلم معنى الكلمة؟
كتبت: سهام عثمان.
