النداهة اللي في حياتي وحكاويها اللي مبتخلصش

حياتنا مليانة بالحكايات والأساطير منها اللي بنصدقه ومنها اللي بيحتاج خيال أوسع من عقولنا فبيبقى صعب علينا نصدقه..

من الحكايات والأساطير دي أسطورة النداهة أسطورة اتربينا عليها واتحكالنا عنها حكايات كتير ومش بس كدا دا اتعمل عليها روايات وقصص وكتب عنها كبار الأدباء لا وكمان اتعملت في أعمال فنية كبيرة أهمها وأكثرها انتشارا مسلسل ما وراء الطبيعة ..

بس هل النداهة مجرد حكاية بتتحكي وقصة زي باقي القصص ولا الموضوع أكبر من كدا وهي فعلا موجودة في حياة كل واحد فينا ..

قبل ما نجاوب على السؤال دا هاخدك في جولة سريعة واسرح معايا بخيالك كدا عشان هعرفك ايه هي أصل حكاية النداهة ..

أصل الحكاية :

النداهة وعلى حسب ما اتحكلنا هي بنت من العالم السفلي (جنية) زي ما بنقول جميلة جدا في شكلها وصوتها بتنادي على الرجالة بمجرد ما تسمع صوتها فهي بتسحرك وبتلبي الصوت دا من غير ماتفكر انت رايح فين وبتفضل ماشي وراه لحد لما بتاخدك لعالمها السفلي ولو معجبكش العيشة في عالمها فهي بتقتلك عشان متفضحش العالم دا ..

ويقال إن أصل الحكاية دي كانت في الأرياف ، كان في بنت جميلة كل البنات بتغير منها ومن جمالها وكل الرجالة وشباب القرية كان نفسهم يتجوزوا البنت دي وفي يوم فرحها اتجمع مجموعة من الشباب وقتلوا البنت دي في أحد الغيطان ، ومن اليوم دا وبدأت النداهة تظهر وتاخد كل يوم واحد وتقتله .

ناس قالوا إن الأسطورة دي ما هي إلا ستارة الناس بتخفي وراها الجرايم بتاعتهم وعشان الإنسان بطبعه بيميل لخلق أساطير وبيصدق حكايات ما وراء الطبيعة فالحكايات دي كانت بتتصدق..

بس بعيدا عن القصص والحكايات والأساطير تعالى أعرفك على النداهة اللي في حياتي ..

النداهة اللي في حياتي:

قبل ما احكيلك عنها هسألك سؤال.. انت اتندهت من كام نداهة ؟؟

أكيد انك بمجرد ما شوفت السؤال هتقول عليا مجنون .. بس أنا مش عايزك تجاوب دلوقتي كمل معايا للآخر وانت هتجاوب على السؤال دا بنفسك .

من كام شهر كنت حضرت دورة تدريبية (كورس) عن الكتابة المحاضر لما عرف أني خريج كلية الزراعة سألني من امتى ندهتك نداهة الكتابة ؟؟

مفهمتش معنى اللفظ وقتها بس فهمته بعدين لما كنت بتكلم مع زميلة صحفية كانت بتقول إن الموت ماعادش يفرق معاها من كل اللي بقت تشوفه ..

أي حادثة هي خبر جديد ، أي عمل فني الناس كلها تستمتع بيه هو بالنسبة لها تقرير جديد ، أي حد ناجح هو عبارة عن شغل وحوار جديد..

والإحساس دا بقى عند كل الناس اللي اشتغلوا في المجال ، بقت أي ظاهرة جديدة ماهي إلا فكرة مقال جديدة.

النداهة دي ممكن متكنش بتاخدك من حياتك ولا بتضيع وقتك بالعكس هي خلتك تشوف الحياة بطريقة جديدة بس في نداهات تانية بتغرقك لو ملحقتش نفسك في الوقت المناسب هتندم..

وعشان متتندهش من أي نداهة خليك في وسط الناس أو خلي معاك رفيق دايما يفوقك كل ماتتنده من نداهة هتضرك..

واستناني في الجزء التاني من سلسلة النداهة اللي في حياتي وحكاويها اللي مبتخلصش …

بقلم: أحمد عبدالسلام