٧٠ سبب للبهدلة زمان و لكل زمان .
كتب / مهاب حسن
طبعاً لما حضراتكم قرأتم العنوان قولتوا : هو أنت يا كاتب المقال جاى تحزنا على نفسنا ولا إيه ؟ ، يا عم هى ناقصة بهدلة ما كفاية اللى إحنا فيه .
خلونى أقول لحضراتكم أن موضوعنا النهارده و لكذا مقالة جاية ، إن دى بهدلة من نوع خاص بهدلة جميلة و حلوة جداً طعمها طعم العسل و اللى يتذوق العسل لا يرضى بأقل منه ، بهدلة لا يشعر بلذتها الا الموجود جواها و عايش تفاصيلها ،
بكل بساطة لذتها بتخليك زى السكران و إنك مش عايز الا لذة النوع ده من البهدلة …. ( عمرك حبيت إنك تتبهدل ؟ ) .. متستعجلش هتحب .
ضيفنا هو الجندي المجهول اللى ممكن و بكل بساطة يدخل و يقلب موازين أى حكاية و دنيا و حياة و يحقق اللى بنقول عليه مستحيل ، لأنه كمان و ببساطة أكثر يجعلك فى مركز ثقة و قوة و مؤمن باللى بتعمله من خلاله لأنه ناشئ و جاى من جواك و اللى بيخليه سندك طول العمر إذا أنت صادق فيه .
أحيانًا بتحس بالإنجذاب أو الإعجاب ناحية شخص أو بنقول إنها كيمياء متبادلة بين إثنين و ده صح ، هو إحساس بيضم معانى الغرام و التعلق بشخص بشكل لا تستطيع التخلص منه و اللى متصبرش على مفارقته أبداً ، فيه ناس بتقول عليه ( أرتباط ) ، لكن أنا بعتبر و بقول إن الإرتباط هو المرحلة الثانية له ، لإن مفيش إرتباط ناجح من غير (( الحب )) .
الحب شئ أساسى و لولا الحب مكانتش دنيا قامت ولا كانت أصله أنواع :
- حب الله : بس ده مش بهدلة ببساطة لإن ده اللى بيهدينا و يقدرنا و ينورنا و يعرفنا إزاى الخروج من أى بهدلة .
- حب الوطن .
- حب الأب و الأم و الأسرة .
- حب العمل .
- حب الخير .
لكن اللى هتكلم عنه هو اللى شاغل بالنا كلنا كبير قبل صغير
(( حب الحبيب للحبيب )) الحب الصادق .
الحب الصادق هى أحاسيس و مشاعر بجد ليست شهوانية ولا تقدر بثمن و هى كمان نعمة من الله نحسها تجاه شخص بتجعله نصفك الثاني و اللى يتم عليها بناء حياتكم اللى بذرتها الأهتمام و التقدير و الأحترام من غير أى مصالح مادية أو شخصية ، كمان بيخلى المُحب يبذل أقصى جهده و طاقته عشان يسعدحبيبه ، أحيانًا بنسمع واحده بتقول أنا بحب مجنون و فرحانه و هى بتقولها .. أهو (( الجنان )) ده هو أقصى جهد و طاقة فى الحب ، كمان الحب الصادق هو اللى بيخلى دايماً حبيبك فى بالك مهما إنشغلت و يخليك تتحرر من كل القيود الغير ضرورية و تتصرف بطبيعية و بيخليك مميز عند حبيبك و حبيبك مميز عندك ( هو / هى فى كافة و الدنيا كلها فى كافة ) ، الحب بيكون هو نقطة قوتك و عمره ما يكون نقطة ضعفك ، و اللى بيقول ان الحب ممكن يكون نقطة ضعفه يبقى مش فاهم و مفهمش الحب كويس .
من مميزات الحب الصادق : متعة النظر للحبيب و القرب منه و الإشتياق المتواصل حتى لو هو قدام عينك ( الله يكون فى عون اللى بيحبوا من بلاد بعيده عنهم ) ، هو الأُلفة و الفكر الواحد و الروح الواحدة و الإيثار و محاولة إصلاح النفس و إستغلال العيوب و تحويلها لصالحكم ، أصل الكمال لله وحده .
الحب الصادق لن يمر مرور الكرام و خلاص ، ده ليه علامات بتظهر و بتبان بمعنى أصح ( بتفضحنا ) و دون أن نشعر بنعملها و هى :
– إنك بتهتم بالطرف الثانى و مشاعره و بتقدم له كل الحنان و الاستقرار والعاطفة و الأمان الكافي .
– بتجعل الطرف التانى هو أول أولوياتك .
– بتفكر فى حبيبك الأول قبل نفسك لأنه فى الحالة دى بيكون هو نفسك .
– بتحقق اللى بتوعد حبيبك بيه و إنك مبتكدبش عليه أبداً .
و كما قولت لحضراتكم إن فيه ٧٠ سبب للبهدلة أقصد ( للحب ) و اللى بداية من المقال ده و المقالات القادمة هنستعرضهم واحده واحده و الأسباب دى بتكون موجوده عند الرجل و الست ( الأنثى ) و عشان ( الرجال قوامون على النساء ) هخلى الكلام على الرجال و يلا بينا نستعرض أول ٤ أسباب و اللى أول ٣ منهم مرتبطين ببعض إرتباط كلى و جزئى و اللى بييجوا ورا بعض بالترتيب ( الأهتمام ).. اللى بتتولد منه ( الثقة ) .. اللى بتخليك كحبيب تكون ( السند ) .
و نروح لأول سبب اللى هو كالماء للورد
١ – ( الأهتمام )
الأهتمام هو بداية التعلق ، الغيرة بداية الحب ، الصداقة بداية الإكتفاء … تخيل لما يكون عندك شخص واحد فيه المواصفات دى ، الأهتمام هو الترجمة الفعلية للحب لإن عندنا فيه جملة شائعة بين الحبيبة ( الأهتمام مبيطلبش ) .. إذا ركزنا فى الجملة دى هنلاقى معناها كبير جداً لأن لا فائدة من الحب بلا إهتمام لأن الأهتمام بالتفاصيل الدقيقة هو اللى بينمى الحب و يعيشه مدى الحياة.
كمان فيه علاقة طردية بتقول كلما زاد حجم الحب زاد معدل الإهتمام بين المحبين .. و إن أشكال الأهتمام كتير لإن الغيرة هى إهتمام ، المساندة فى الشدة هىإهتمام ، المشاركة فى الحزن و الفرح هى اهتمام ، إسعاد الحبيب هو اهتمام ، التقرب هو اهتمام ، لإن الحب زيه زى كل المشاعر الإنسانية محتاج لتغذية عشان يرعرع فمحتاج اهتمام و ده طبعا بيكون جنب ( التقدير ، الأحترام ، الأمان فى كل شئ ، الدعم المعنوي و النفسي ) و البعد كل البعد عن ( سوء الظن ،الغدر ، الخيانة ، عدم الثقة ) .
كمان نعمة الأهتمام دى لها أشكال كتير منها :
– تقديم الهدايا و المفاجآت اللى هى سبب واضح للسعادة .
– المسامحة و الغفران و القدرة على تجاوز أخطاء شريكتك و المواقف الصعبة يعنى ( مانقفش لبعض على الواحدة ) .
– المحافظة على حقوق شريكتك و تحمل المسؤولية تجاهها .
– الإلتزام بالوعود و الدعم النفسي و المعنوي الكامل .
– الأخذ بالمشورة و البعد كل البعد عن الجدال الغير مفيد لأنه بيخلق مشاكل .
– مشاركة الأهتمامات و الأستمتاع بها لأنكم بتكونوا واحد فى الوقت ده .
– إنتهاز الفرص للتقرب للشريك أو الحبيب .
– السمع للحبيب أو الشريك فى كل كبيرة و صغيرة من غير ملل و المساعدة على حل المشاكل .
٢ – الثقة
كلمة ( الثقة ) دى مش بالساهل إنها تتقال أو تتحس لأن أى شئ يحتمل وجود فرصة تانية إلا ( الحب ، الصدق ، الثقة ) عندما تنهار لن تعود و لو منحت ١٠٠٠ فرصة ، لأن إنعدام الثقة هو بداية إحتضار الحب .
الثقة ( نصف الحب و مفتاحه ) و هى طبيعى شئ أهميته كبيرة جدا لأسباب منها :
– السيطرة على النفس لإن بالتأكيد أنت كرجل بتسأل نفسك عن الكيفية اللى اتصرفت أو بتتصرف بيها حبيبتك أو شريكتك فى موقف اختلاط بالرجال داخلالعائلة أو العمل و من هنا
النار بتبدأ فى صدرك ( يا ساتر يا رب على الشك ) ، لكن بعد لحظات من التفكير و شوية عقل انت بتدرك إنها عارفه إيه اللى ممكن يضايقك فبالتالى هى مش هتعمله و أنت عارف هى ازاى هتعرف تصد و ترد و فى اللحظة دى هيُطلق عليك لقب
( يا جبل ما يهزك ريح ) .. ( هييجى واحد يقول لى : طب يا كاتب المقال أنت ..اللى مش بتعمل كده و مطلعه عينى فى التفكير فى النقطة دى بالذات .. هقول له: أخلع منها يا حلو لأن ده بداية الهلاك ، الغيرة حلوة .. الغيرة حلوة مفيش كلام بس زيادتها مؤلمة ، لإن من زاد عن حده إنقلب ضده ).
– الثقة هى قُبلة الحياة لأننا بنشوف رجال و نساء بعد عدة علاقات عاطفية فاشلة بالرغم من إن العلاقات دى كان يحاوطها الحب من كل جانب ، بنلاقى الناس دى إبتعدت عن التفكير فى الحب و ده بيتعبهم أكتر و ده كله بسبب إنعدام الثقة فى الجنس الآخر ، لكن كل الأفكار القاتلة و اللى ملهاش لازمه دى بتروح بمجرد أن يثق الرجل فى إمرأة أخرى و أن تثق المرأة فى رجل اخر اللى بيرجع لقلوبهم الحياة من تانى .
– بعد النظر و معرفتك بكيفية تصرفات الشريك فى معظم المواقف و اللى بيعطيك نظرة أوضح فى الحكم على الأمور العاطفية ، لإن مشاكل الحب محتاجةحكمة و تفكير قبل مناقشتها و ده اللى بتوفره الثقة .
(( الثقة و الحب سر تألق الحياة الزوجية ))
٣ – السند
هو الشخص اللى بيفهم و يعرف كل تفاصيلك حتى الصغيرة جدا و عمره ما يقلل منك ، الشخص اللى بيحسسك بالأمان فى الوقت اللى انت خايف فيه من كلشئ حواليك و اللى بتحس إنك ممكن تحكى له كل شئ جواك من غير قيود و من غير خوف إنه يفهمك غلط ، شخص بيشجعك على أحلامك و اهدافك و ود أهلكو الأصحاب و صلاح حالك و دنياك و يخلى حياتك متوازنه ، شخص شايفك الحبيبة و الزوجة و ابنته الصغيرة و الأم و الأخت و الصديقة .
شخص بيدفعك دايماً للأمام فى الوقت اللى فيه الكل بيقولوا لك مستحيل لأن نجاحك هو نجاحه .
هو الشخص اللى يستحق إنك تكملى معاه و انك تكونى روحه و نصفه الثانى لكن فى الحالة دى إنتى بتكونى ( نصفه الأول ) مش التانى .
٤ – لأنه رومانسى
ده بقى الجانب اللى المفروض يبقى موجود من أول يوم حب بينكم لغاية أما تبقوا ( جدو و تيته ) ، مش يبقى موجود بينكم فى أول الحب و بعد كده حضرتكتعمل لى ( سى السيد ) و ترفع حاجب و تنزل التانى لا .
الرومانسية هى روح الحب كمان أنت مش لازم ( تتنحنح ) عشان تكون رومانسى ولا الحب كلام حلو بس و بما ان الحب أفعال و الرومانسية روحه يبقى هىكمان أفعال و فى حاجات كتير ممكن تبين رومانسيتك مثل :
- بكل سهوله ممكن تطبع صورتها على تيشرت أو فنجان أو تقديم هدية و لو بسيطة زى ( وردة حمراء ) و اللى إنت ممكن تتلكك بأى سبب عشان تشوفهاو تفاجئها بالهدية دى ، و فكر دايماً فى الأمور و التفاصيل الصغيرة البسيطة عشان بتفرق كتير .
- خلى صباحها مميز بإنك تصحيها و إنت مستنيها فى كافيه معين و تفطروا مع بعض..خليها تبدأ يومها بيك.
- أتصل بيها فى عز انشغالها أو شغلها أو شغلك عشان تقول لها ( بحبك ) و أقفل على طول .
- أحتفل بعيد ميلادها إنت و هى بس .
- أطلعوا رحلة سوا فى مكان بعيد و هادئ أو رحلات التخييم و أصحوا بدرى و شوفوا شروق الشمس سوا .
- ممكن تتمشوا مع بعض فى جو شتوى فيروزى النزعة أو تحت ضوء القمر و إنت حاطط نوع عطر معين هى بتحبه أو هى ميزته عليك فى أول مرةاتقابلتوا لأن ذاكرتها بطربطك بالعطر ده على طول .
عايز أوجه لحضراتكم رسالة بعد إذن حضراتكم و ياريت تفهموها كويس :
احنا بنحب عشان نكون احسن عشان نرتاح عشان نبقى واحد مش عشان نتعب و نعيش فى الهم ليل نهار .. الحب مصدر السعادة و نقطة القوة لكل إنسان مش زى ما فاهمينه الناس المريضه سواء كانوا جارحين أو مجروحين أو اللى بيلعبوا بقلوب الناس إنه نقطة الضعف اللى بينكسر منها الواحد فينا ..
الحب موجود فى كل وقت بس محتاج اللى يفهمه و يقدره صح و يتعرف معناه صح و ناس مخلصه لبعض .. لكن للأسف فيه ناس كتير من اللى بتحب بيحبوا بشهوتهم لكن مش بإخلاص ..
يبقى مش ذنب الحب إنكم تتعقدوا منه .
افهموا الحب .
و دلوقتى .. عرفت هتبتدى حبك إزاى ؟
