في ناس بتلعب كورة في الشارع
وناس بتمشي تغني وتاخد صورة في الشارع
في ناس بتشتم بعض تضرب بعض تقتل بعض في الشارع
في ناس تنام ع الارض في الشارع
وناس تبيع العرض في الشارع
وفي الشارع اخطاء كتيرصبحت صحيحة
لكن صحيح هتكون فضيحة لو يوم نسينا و بوسنا بعض في الشارع
* امينه جاهين
اول حاجة هتسمعها في الفيلم هو الكلام اللي فوق دة .
و بصوت الفنان احمد زكي . اه احمد زكي لان هو البطل اللي كان مرشح يقوم بدور بطل الفيلم (فارس) قبل ما يختلف مع المخرج محمد خان.
في التتر هتلاقي عادل امام (فارس ) بيجري ومش طالع غير صوته وهو بينهج .
اه دي علامه يا مارد قصدها محمد خان مخرج الفيلم . تحس ان عايز يقول ان اللي جاي في تعب وارهاق .
الحريف ماتقدرش تقول عليه فيلم او شخص . الحريف هو كل واحد فينا . لان كل واحد فينا حريف ولكن ……..
مزيكا من التمانينات والوان جميله طبيعية من مصر الغالية بتحكي عن فترة جميله لناس من الشارع المصري .
ناس بتفرح وتزعل بتكسب وتخسر . باختصار ناس بتعيش .
بس بتعيش وعايزة تعيش.
او نفسها تعيش.
في الفيلم هتلاقي سطوح بيت . واعلانات فوق السطوح .و هتلاقي مصنع احذية . وعربية كبدة . ويفط محلات . ومحلات ايس كريم و ملاعب كورة . ومعدية بور سعيد كمان .
في الفيلم هتلاقي من نفسك كتير .
في الفيلم هتلاقي الحريف.
الفيلم بطولة : عادل امام . فردوس عبد الحميد . عبد الله فرغلي . زيزي مصطفي . نجاح الموجي .
قصة وسيناريو وحوار : بشير الديك .
تصوير : سعيد الشيمي .
تاليف واخراج : محمد خان .
